- Филето го засекуваме по должина, го прекриваме со најлонска фолија и го толчиме со чук. Посолуваме и наросуваме мелен црн пипер. Го ставаме месото на фолијата и на него скалесто редиме ленти чаден свински врат.
- На маслинките им ги отстрануваме семките, ситно ги сечкаме и ги нанесуваме на свинскиот врат. На крупната страна од рендето на чинија го рендаме кашкавалот и го нанесуваме на маслинките. Краевите на месото ги толчиме со чукот и со помош на фолијата виткаме ролат.
- Го свиткуваме во алуминиумска фолија, намрсена со масло и го ставаме ролатот во тава за печење. Додаваме 150 мл вода и ја ставаме тавата во рерна. Печеме 1 час на 220 степени и ја вадиме од рерна. Го вадиме ролатот од тавата, му ја отстрануваме фолијата и го сечеме на парчиња.
- Главицата кромид ситно ја сечкаме и ја пржиме на загреано масло во тава на оган. Преостанатите ленти чаден свински врат ги сечкаме на парчиња и ги додаваме во тавата со омекнатиот кромид.
- Ги додаваме маринираните шампињони и околу 100 мл вода. Откако содржината ќе се издинста ја тргаме тавата од оган. Компирите ги гмечиме со алатка за пире и ги ставаме во длабок сад. Ги додаваме јајцето и брашното, и мешаме со лажица додека не добиеме хомогена смеса. Со лажица од смесата ставаме на загреано масло во друга тава на оган.
- Откако крокетите ќе поруменат од двете страни ги вадиме од тавата и ги ставаме на чинија. Чинијата за сервирање ја украсуваме со листови марула.
- На средината на чинијата ги ставаме испржените шампињони со кромид и свински врат, и врз нив скалесто ги редиме парчињата филе. Од двете страни ги сервираме крокетите. Декорираме со две декоративно засечени половинки домат и парчиња краставица.
Со ова јадење ви предлагаме да се напиете квалитетно суво црвено вино. Се служи на температура од 18-20 степени.
Добар апетит.
