May 10, 2022

Најлон Торта

Десерти

Ако е поентата во тоа парче или две што останале од тортава во фрижидер да ги покриете со најлон за да не се засушат, подобро ќе беше да се вика Фолија торта. Шегата на страна, тортава е супер, лесна вкусна и убаво декорирана, па тешко дека ќе остане нешто за покривање, било со најлон било со фолија.

Торти

Потребно е:

10 јајца

ЗА ПАНДИШПАН

500 г шеќер
4 лажици брашно
2 кафени лажици оцет

ЗА ФИЛОВИ

1 литар млеко
16 лажици шеќер
500 г путер
200 г чоколада за готвење
10 крем банани

Подготовка:

Почнуваме со подготовка на пандишпанот. Јајцата ги кршиме и ги делиме белките од жолчките. Ги матиме белките со миксер. Во садот го додаваме шеќерот и матиме додека не се растопи.
Потоа го додаваме оцетот и матиме додека белките не ја добијат потребната цврстина. И брашното го додаваме во садот и мешаме со лажица додека смесата не се соедини. Ја нанесуваме во тркалезен калап бр 26, намрсен со путер.
Го ставаме калапот во рерна. Печеме 45 минути на 150 степени и го вадиме од рерна. Почнуваме со подготовка на филовите. Во садот со жолчките ги додаваме брашното и 200 мл млеко, и матиме со миксер додека смесата не се соедини.
Преостанатото млеко го ставаме во тенџере на оган и го додаваме шеќерот. Потоа непрекинато мешајќи со жица ги додаваме жолчките со млеко и брашно во зовриеното млеко во тенџерето на оган.
Откако кремот ќе ја добие потребната густина го тргаме тенџерето од оган. Оставаме кремот да се излади. Чоколадата ја кршиме на парчиња и ја ставаме во сад на пареа. Откако ќе се растопи го тргаме садот од оган.
Оставаме чоколадата да се излади. Во сад за матење со миксер го матиме путерот додека не стане пенест. Го додаваме изладениот крем и матиме додека смесата не се соедини. Половина од смесата ставаме во друг сад.
Крем бананите ги сечкаме на парчиња. Ги додаваме во првиот сад и го промешуваме филот со лажица. Во вториот сад ја додаваме изладената растопена чоколада и мешаме со лажица додека филот не се соедини.
Изладениот пандишпан го вадиме од калапот и го сечеме на половина. Првата кора пандишпан ја ставаме на чинија за торта и ја премачкуваме со филот со крем банани. Врз него ја ставаме втората кора пандишпан и целата торта ја премачкуваме со чоколадниот фил.
Страничниот дел на тортата го облепуваме со бели шеќерни трошки. Горната површина на Најлон тортата ја декорираме со бели и жолти шеќерни трошки. Отсекуваме едно парче од тортата и го ставаме на чинија за сервирање.

Со овој десерт ви предлагаме да се напиете квалитетно суво бело вино. Се служи на температура од 10-12 степени.

Добар апетит.