1. Во длабок сад го ставаме брашното и го посолуваме. Ги додаваме шеќерот и едно јајце. Квасецот го рониме со рака и го додаваме во садот. Потоа постепено го додаваме млекото и со рака замесуваме тесто. Оставаме да стасува 30-тина минути на топло место.
2. На крупната страна од рендето во длабок сад го рендаме кашкавалот. Круговите шунка и шампињоните ситно ги сечкаме, и ги додаваме во садот. Преостанатото јајце го кршиме и ја делиме белката од жолчката. Ја додаваме белката во длабокиот сад. Потоа го додаваме кечапот и го промешуваме филот.
3. На набрашнета работна маса го размесуваме стасаното тесто. Го делиме на 20 еднакви делови и формираме топчиња. Од првото топче тесто со сукалка развлекуваме елипсеста кора. Едниот крај на кората го засекуваме на повеќе места. На средината нанесуваме од филот и од незасечениот крај на кората почнуваме да ја виткаме кифлата.
4. На истиот начин ги формираме сите кифли. Ги редиме во тава за печење, обложена со хартија. Преостанатата жолчка ја матиме со виљушка и со готварска четка ги премачкуваме кифлите. Ги наросуваме со сусамот и ја ставаме тавата во рерна. Печеме 30 минути на 190 степени и ја вадиме од рерна.
5. Од Пица кифлите редиме на чинија за сервирање.

Со ова предјадење ви предлагаме да се напиете квалитетно суво бело вино. Се служи на температура од 10-12 степени.

Добар апетит.