rolat-od-svinski-but2

Ролат од Свински Бут

Е, и да беше само испечен со лук и вино на свинскиот бут ништо немаше да му фали, де. Ама, така ќе беше за свечен неделен ручек, а вака наполнет со пржена сланина со кромид, мелено месо и варени јајца, па ролуван е како измислен и за пред гости.

Потребно е:

2 кг свинско месо од бут
500 г мелено свинско месо
150 г кромид
50 г чадена сланина
1 јајце
3 чешниња лук
1 кафена лажица лут црвен пипер
½ кафена лажица сува мајчина душичка
½ кафена лажица мелен ким
4 варени, лупени јајца
100 мл бело вино
масло за јадење
Хималајска сол и црн пипер

Подготовка:

  1. Месото го засекуваме на повеќе места, за да добиеме рамна површина за ролување. Го посолуваме, го наросуваме со мелен црн пипер од двете страни и оставаме да ги впие зачините.
  2. Сланината ја сечкаме на коцки и ја пржиме на загреано масло во тава на оган. Главиците кромид ситно ги сечкаме и ги додаваме во тавата со поруменетата сланина.
  3. Посолуваме и наросуваме мелен црн пипер. Откако кромидот ќе омекне ја тргаме тавата од оган. Содржината ја додаваме во садот со меленото месо. Ги додаваме мајчината душичка, мелниот ким и црвниот пипер.
  4. Посолуваме и наросуваме мелен црн пипер. Ситно сечкаме 1 чешне лук и го додаваме во садот. Кршиме 1 јајце, па и него го додаваме во садот. Го мешаме филот со лажица. Зачинетото свинско месо го толчиме со чук и на него нанесуваме половина од подготвениот фил од мелено месо.
  5. Варените јајца ги сечеме на половина по должина. Наизменично, една половинка со белката, а друга со жолката нагоре ги редиме на филот. Ги притискаме половинките варени јајца со раце, го нанесуваме преостанатиот фил и виткаме ролатот.
  6. Го зацврстуваме со готварски конец и го ставаме ролатот во тава за печење, намрсена со масло. Преостанатиот лук го сечкаме на парчиња и го додаваме во тавата. Ролатот го преливаме со белото вино и ја ставаме тавата во рерна.
  7. Печеме 2 часа на 200 степени и ја вадиме од рерна. Го вадиме ролатот од тавата, го отстрануваме конецот и го сечеме ролатот на парчиња.
  8. Чинијата за сервирање ја украсуваме со листови марула и скалесто ги редиме парчињата Ролат од свински бут. Додаваме претходно обарен мешан зеленчук. Декорираме со гранчиња француски магдонос и декоративно засечени половинки ротквички.

Со ова јадење ви предлагаме да се напиете квалитетно суво црвено вино. Се служи на температура од 18-20 степени.

Добар апетит.

Погледнете го видеото!

Leave a Reply

Your email address will not be published.

Слични рецепти: