1. Филетите од ослич ги сечеме на парчиња, ги миксаме во блендер и ги ставаме во длабок сад. Магдоносот и чешнињата лук ситно ги сечкаме, и ги додаваме во садот. Кршиме 2 јајца, па и нив ги додаваме во садот.
2. Посолуваме и наросуваме мелен црн пипер. Ги додаваме лебните трошки и мешаме со лажица додека смесата не се соедини. Оставаме да отстои 60 минути во фрижидер. Од смесата ги формираме ќофтињата, ги набрашнуваме и ги редиме на чинија.
3. Потоа ги пржиме на загреано масло во грил тава на оган. Откако ќе поруменат од двете страни ги вадиме ќофтињата од тавата за пржење и скалесто ги редиме во керамичка тава за печење. Преостанатите 2 јајца ги кршиме во длабок сад и ги матиме со виљушка.
4. Ја додаваме киселата павлака, мешаме со виљушката и ги преливаме ќофтињата во тавата. Гаудата ја сечкаме на коцки и ги распоредуваме на ќофтињата. Ја ставаме тавата во рерна. Печеме 30 минути на 200 степени и ја вадиме од рерна.
5. На чинија за сервирање ставаме од Запечените ќофтиња од ослич и декорираме со кечап. Декорацијата ја завршуваме со листови црвена зелка и гранчиња француски магдонос.

Со ова јадење ви предлагаме да се напиете квалитетно суво бело вино. Се служи на температура од 10-12 степени.

Добар апетит.